সাহিত্য সভাৰ নতুন সভাপতি আৰু সাহিত্যৰ পৰিৱৰ্তিত পৰিস্থিতি

অসম সাহিত্য সভাৰ সভাপতি পদৰ বাবে ইমৰাণ শ্বাহ নিৰ্বাচিত হোৱাটো আনন্দৰ বতৰা, আৰু সেইবাবেই তেখেতক অভিনন্দন৷  অসম সাহিত্য সভাক গতিশীল কৰিবলৈ এতিয়া তেখেতে কেনে উদ্যোগ লয় তাৰ প্ৰতি নিশ্চয় সকলোৱে চকু ৰাখিব৷

বিগত দুটামান দশকৰ পৰাই অসম সাহিত্য সভা বিভিন্ন ধৰণে সমালোচিত হৈ আহিছে-- ইয়াৰ অৰ্থ এইটোৱেই যে অসম সাহিত্য সভাই শুভাকাংক্ষী তথা গুণগ্ৰাহীসকলৰ ইপ্সিত লক্ষ্য পূৰণ কৰাত ব্যৰ্থ হৈছে৷ এই সময়ছোৱাত বিশেষকৈ দুটা মনোযোগ আকৰ্ষণকাৰী কাম হৈছিল-- মহিম বৰাৰ সভাপতিত্বত সভাই বিভিন্ন জনগোষ্ঠীৰ কাষ চপাৰ চেষ্টা কৰিছিল, একেদৰে হোমেন বৰগোহাঞিৰ নেতৃত্বত বিশ্বকোষ আন্দোলনে ঠন ধৰি উঠিছিল৷ কিন্তু অসম সাহিত্য সভাৰ লক্ষ্য-উদ্দেশ্য সিমানতে সীমাৱদ্ধ থাকিলেও নহ’ব৷ সভাৰ সন্মিলীত শক্তিক অসমৰ গণশক্তিত পৰিণত কৰাৰ বাবে এতিয়াও সংগঠিত কৰা হোৱা নাই৷ অসম সাহিত্য সভা মানে ‘‘অসমীয়া সাহিত্য সভা’’ নহয়-- এই ভুল সভাই ইতিপূৰ্বে বহুবাৰ কৰিছে৷ প্ৰকৃততে ‘‘অসম সাহিত্য সভা’’ৰ পৰা ‘‘সাহিত্য’’ শব্দটিয়েই বাদ দি সভাৰ শক্তিক অসমৰ সমূহীয়া কল্যাণৰ বাবে প্ৰয়োগ কৰাটো অত্যধিক জৰুৰী হৈ উঠিছে৷ অসমীয়া সমাজৰ সংকটো এতিয়া বহুমুখী৷ এনে সময়ত সকলোৰে আস্থা অৰ্জন কৰাটোও সাহিত্য সভাৰ অন্যতম কৰণীয়৷ ইমৰাণ শ্বাহে এই দিশবোৰৰ প্ৰতি নিশ্চয় মনোযোগ দিব৷ শ্বাহে সুদীৰ্ঘ দিন ধৰি সাহিত্য সাধনাত নিয়োজিত হৈ আহিছে-- নিৰলে থাকি তেখেতে অসমৰ সমাজ জীৱন নীৰিক্ষণো কৰি আহিছে৷ সাহিত্য সভাৰ হৃত মৰ্যাদা ওভতাই অনাত তেখেতৰ অভিজ্ঞতা আৰু জীৱন বীক্ষাই কেনে ভূমিকা লয়, সেয়া লক্ষণীয় হ’ব৷

আনহাতে সাহিত্যৰো এতিয়া স্বৰূপ সলনি হৈছে৷এসময়ৰ সাঁচিপাত-তুলাপাতত কৰা সাহিত্যৰ চৰ্চাই ছপাৰূপ লৈছিল, এতিয়া ছপা কিতাপে ইলেক্ট্ৰনিক কিতাপৰ ৰূপ লৈছে৷ আমাৰ ইয়াত ইলেক্ট্ৰনিক কিতাপক এতিয়াও মুকলি মনেৰে গ্ৰহণ কৰা হোৱা নাই ঠিকেই, কিন্তু পৰিৱৰ্তনৰ এই বতাহক ৰোধ কৰিব পৰা নাযাব৷সাঁচিপাতৰ পৰা ছপা কিতাপলৈ ঘটা ৰূপান্তৰৰ সময়তো হয়তো নতুন ‘ৰূপ’টিক গ্ৰহণ কৰিবলৈ বহুতো সন্মত হোৱা নাছিল, পিছে এতিয়া  সাঁচিপাতত কোনেও  হয়তো চৰ্চা কৰিবলৈ নিবিচাৰিব৷ সাঁচিপাতত পঢ়াৰ ক্ষেত্ৰতো একেটাই কথা৷ ইলেক্ট্ৰনিক কিতাপকো সেইদৰে গ্ৰহণ কৰিবই লাগিব, আৰু তাৰ বাবে এতিয়াৰে পৰাই সংগঠিতভাৱে অসমৰ সাহিত্যক (কেৱল অসমীয়া নহয়) সাজু কৰাৰো দায়িত্ব ল’ব লাগিব  সাহিত্য সভাই৷ শ্বাহ ডাঙৰীয়াই এই আধুনিক মনৰো পৰিচয় দিব লাগিব৷ এশ বছৰৰো পূৰ্বে এনে আধুনিক মনৰ পৰিচয় দিয়া লক্ষ্মীনাথ বেজবৰুৱাৰ জন্মৰ ডেৰশ বছৰীয়া জয়ন্তীত সেয়াই হ’ব ‘সাহিত্যৰথী’ৰ প্ৰতিও উপযুক্ত শ্ৰদ্ধাঞ্জলি৷